کراچی: پاکستان کے اسکواش کھلاڑی نور زمان اور محمد اصحاب عرفان 2026 ایشین گیمز کے مردوں کے انفرادی مقابلوں کے کوارٹر فائنل میں پہنچ گئے۔
نور زمان نے کویت کے کھلاڑی عمار التمیمی کو مسلسل تین گیمز میں 11-4، 11-9 اور 11-4 سے شکست دی۔ یہ ٹورنامنٹ میں نور زمان کی مسلسل دوسری کامیابی ہے، جس کے بعد انہوں نے کوارٹر فائنل میں جگہ بنا لی۔
محمد اصحاب عرفان نے بھی عمدہ کھیل کا مظاہرہ کرتے ہوئے سعودی عرب کے کھلاڑی محمد النسفان کو 11-9، 11-3 اور 11-5 سے شکست دی اور کوارٹر فائنل میں پہنچ گئے۔
پاکستانی جوڑی مکسڈ ڈبلز کے کوارٹر فائنل میں پہنچ گئی
مکسڈ ڈبلز مقابلوں میں بھی پاکستان نے پیش قدمی جاری رکھی۔ عاصم خان اور مہوش علی کو جاپان کی ایرسا سانو اور ناوکی ہایاشی کی جوڑی کے خلاف پہلے گیم میں شکست کا سامنا کرنا پڑا، تاہم پاکستانی جوڑی نے بعد میں شاندار کم بیک کرتے ہوئے مقابلہ اپنے نام کر لیا۔
پاکستانی جوڑی نے 8-11، 11-10 اور 11-4 سے کامیابی حاصل کی اور اب کوارٹر فائنل میں ہانگ کانگ کی ٹوبی لام یی تسی اور نام چوک لائی کی جوڑی کے خلاف کھیلے گی۔
تاہم پاکستان کی دوسری مکسڈ ڈبلز جوڑی ناصر اقبال اور سحرش علی پری کوارٹر فائنل میں مقابلے سے باہر ہوگئی۔ انہیں ہانگ کانگ کی ہونگ منگ ٹونگ اور یی کا لی کی جوڑی نے 11-2 اور 11-6 سے شکست دی۔
باکسنگ میں بھی پاکستانی کھلاڑی ایکشن میں ہوں گے
باکسنگ میں ماریہ رند خواتین کے 51 کلوگرام وزن کے ابتدائی مرحلے میں مقابلے سے باہر ہوگئیں۔ انہیں تیسرے راؤنڈ کے دوران ریفری کی جانب سے مقابلہ روکنے کے بعد منگولیا کی یسوگن اویونتسے تسیگ سے شکست کا سامنا کرنا پڑا۔
گلاسگو کامن ویلتھ گیمز کی کانسی کا تمغہ جیتنے والی فاطمہ زہرا خواتین کے 60 کلوگرام وزن کے ابتدائی مرحلے میں تاجکستان کی میجگوما سمدووا کے خلاف مقابلہ کریں گی۔
اسی طرح عرفان خان مردوں کے 90 کلوگرام وزن کے ابتدائی مرحلے میں جنوبی کوریا کے گِیچے کم کے مدمقابل ہوں گے۔
پاکستان نے ایشین گیمز کے باکسنگ مقابلوں کے لیے دو مرد اور دو خواتین باکسرز کو شامل کیا ہے۔ پاکستان نے ایشین گیمز میں باکسنگ کا آخری تمغہ 2014 میں حاصل کیا تھا، جب محمد وسیم نے کانسی کا تمغہ جیتا تھا۔
