ساندہ پولیس نے پتنگ فروشوں کے خلاف کارروائی کرتے ہوئے 2 بڑے ڈیلروں کو گرفتار کرلیا، جن کے قبضے سے ہزاروں گڈے اور غیر قانونی ڈور کی درجنوں چرخیاں برآمد ہوئی ہیں۔
پولیس کے مطابق دونوں ملزمان کو ایم اے او کالج کے قریب کارروائی کے دوران گرفتار کیا گیا۔ ملزمان کے قبضے سے مجموعی طور پر مختلف سائز کے 2250 گڈے اور غیر قانونی ڈور کی 31 چرخیاں برآمد ہوئیں۔
پولیس کا کہنا ہے کہ ملزمان نے پتنگیں اور ڈور پلاسٹک کے توڑوں، کپڑے کی چادروں اور گتے کے ڈبوں میں چھپا رکھی تھیں۔
گرفتار ملزمان کی شناخت محمد علی اور عمر فاروق کے نام سے ہوئی ہے۔ دونوں کے خلاف کائیٹ فلائنگ ایکٹ کے تحت مقدمہ درج کرلیا گیا ہے۔
ایس پی ماڈل ٹاؤن سدرہ خان نے کہا ہے کہ پتنگ بازی کی اجازت حکومتی احکامات کے مطابق صرف بسنت کے دنوں میں ہوگی، جبکہ خلاف ورزی کرنے والوں کے خلاف سخت کارروائی کی جائے گی۔
