27ویں عربین گلف کپ کے 14 روزہ مقابلوں نے جدہ میں کھیل کے ساتھ سیاحت، ثقافت اور تفریح کے رنگ بھی بکھیر دیے۔ کنگ عبداللہ اسپورٹس سٹی اور پرنس عبداللہ الفیصل اسپورٹس سٹی میں ہونے والے میچز سے آگے بڑھ کر شہر کے مختلف مقامات شائقین اور سیاحوں کی توجہ کا مرکز بنے۔
سعودی پریس ایجنسی کے مطابق ٹورنامنٹ نے دنیا بھر سے آنے والے لوگوں کو جدہ کو ثقافت اور تفریح کے عالمی مرکز کے طور پر دیکھنے کا موقع فراہم کیا۔
سعودی قومی ٹیم کی جانب سے ٹرافی جیتنے کے بعد بھی جشن کا سلسلہ جاری رہا۔ روشِن واٹر فرنٹ نے گرین فالکنز کے کھلاڑیوں کا استقبال کیا، جہاں کھلاڑیوں نے شائقین کے ساتھ ٹائٹل کی خوشی منائی۔
ٹورنامنٹ کے دوران تاریخی جدہ کے قدیم علاقوں اور گلیوں میں بھی مختلف سرگرمیاں دیکھنے میں آئیں۔ اپنی قومی ٹیموں کی حمایت کے لیے آنے والے شائقین نے مقامی شہریوں اور دیگر سیاحوں کے ساتھ وقت گزارا اور شہر کی ثقافتی زندگی کا حصہ بنے۔
ان سرگرمیوں نے جدہ کی ثقافت، فنون اور سماجی زندگی کی مختلف جھلکیاں پیش کیں اور شہر کے منفرد ماحول کو نمایاں کیا۔
سیاحوں کو جدہ کے ساحلی حسن سے لطف اندوز ہونے کا ایک اور موقع واٹر ٹیکسی کے ذریعے ملا، جس کے ذریعے مسافروں نے سمندر کا سفر کرتے ہوئے شہر کے اہم مقامات اور ساحل پر موجود ریستورانوں کے مناظر دیکھے۔
واٹر ٹیکسی کا یہ تجربہ جدید سفری سہولت کو بحیرہ احمر کے قدرتی حسن کے ساتھ جوڑتا ہے، جو جدہ کی نمایاں ساحلی شناخت کا اہم حصہ ہے۔
جدہ بڑے عالمی ایونٹس کی میزبانی کے لیے اپنی حیثیت مزید مضبوط کر رہا ہے۔ جدید انفرااسٹرکچر، عوامی سہولیات اور بہتر ٹرانسپورٹ نظام شہر کو مختلف شعبوں میں بین الاقوامی تقریبات کے انعقاد کے لیے موزوں بناتے ہیں۔
جدہ کو مکہ مکرمہ اور مدینہ منورہ سے حرمین ہائی اسپیڈ ریلوے کے ذریعے بھی جوڑا گیا ہے، جس سے زائرین اور سیاحوں کے لیے ان شہروں کے درمیان سفر مزید آسان ہوگیا ہے۔
