اسلام آباد میں پاکستان کا پہلا تھیم پارک تعمیر کرنے کے منصوبے پر پیش رفت ہوئی ہے۔ اس مقصد کے لیے سعودی سرمایہ کاروں کے ساتھ مفاہمتی یادداشت پر دستخط کیے گئے ہیں، جس کے تحت کیپیٹل ڈیولپمنٹ اتھارٹی (سی ڈی اے) منصوبے کے لیے اراضی فراہم کرے گی، جبکہ سرمایہ کاری سعودی فریق کی جانب سے کی جائے گی۔
معاہدے کی تقریب تاریخی قذافی اسٹیڈیم میں منعقد ہوئی، جس میں وفاقی وزیر داخلہ اور چیئرمین پاکستان کرکٹ بورڈ محسن نقوی نے بطور مہمان خصوصی شرکت کی۔ مفاہمتی یادداشت پر سعودی پاکستان بزنس کونسل کے چیئرمین شہزادہ منصور بن محمد السعود اور چیئرمین سی ڈی اے سہیل اشرف نے دستخط کیے۔
محسن نقوی نے معاہدے کا خیرمقدم کرتے ہوئے شہزادہ منصور بن محمد السعود کو مبارک باد دی۔ انہوں نے سعودی عرب سے آنے والے مہمانوں کا استقبال کرتے ہوئے کہا کہ اسلام آباد کے بنیادی ڈھانچے کو جدید شہروں کے معیار کے مطابق بہتر بنایا جا رہا ہے اور سعودی سرمایہ کاروں کو ہر ممکن سہولت فراہم کی جائے گی۔
وفاقی وزیر داخلہ کے مطابق تھیم پارک کا منصوبہ اہمیت کا حامل ہوگا اور اس کے دور رس اثرات مرتب ہونے کی توقع ہے۔ انہوں نے بتایا کہ پاکستان کے رئیل اسٹیٹ شعبے میں سرمایہ کاری کے مواقع متعارف کرانے کے لیے آئندہ چند ماہ میں سعودی عرب میں ایک روڈ شو منعقد کرنے کی بھی منصوبہ بندی کی جا رہی ہے۔
اس موقع پر شہزادہ منصور بن محمد السعود نے پاکستان، بالخصوص اسلام آباد، میں سرمایہ کاری کے مواقع کو بہترین قرار دیا۔ تقریب میں سی ڈی اے کے ارکان اور سعودی وفد کے دیگر اراکین نے بھی شرکت کی۔
