پاکستان کی 38.3 فیصد آبادی کثیرالجہتی غربت کا شکار ہے، جبکہ مزید 12.9 فیصد افراد کو اس غربت میں مبتلا ہونے کا خطرہ لاحق ہے۔ اقوام متحدہ کے ترقیاتی پروگرام (یو این ڈی پی) کی رپورٹ میں بتایا گیا ہے کہ غربت کا جائزہ صرف آمدن سے نہیں بلکہ صحت، تعلیم اور معیارِ زندگی سے جڑی محرومیوں کی بنیاد پر بھی لیا جاتا ہے۔
رپورٹ کے مطابق پاکستان میں کثیرالجہتی غربت کی شرح بھارت میں 16.4 فیصد اور بنگلہ دیش میں 14.9 فیصد ہے۔ پاکستان میں اس غربت کا سامنا کرنے والے افراد کو مختلف بنیادی سہولیات اور مواقع کی کمی کا بھی سامنا ہے، جبکہ ان میں محرومیوں کی شدت 51.7 فیصد ریکارڈ کی گئی ہے۔
کثیرالجہتی غربت جانچنے کے لیے غذائیت، بچوں کی اموات، تعلیم کے سال، اسکولوں میں حاضری، صفائی، پینے کے صاف پانی، بجلی، رہائش اور گھریلو اثاثوں سمیت متعدد اشاریوں کو مدنظر رکھا جاتا ہے۔ اس طریقۂ کار کے تحت غربت کی وہ صورتیں بھی سامنے آتی ہیں جو صرف آمدن کے اعداد و شمار سے واضح نہیں ہوتیں۔
یو این ڈی پی کی رپورٹ میں عالمی سطح پر بھی غربت میں اضافے کی نشاندہی کی گئی ہے۔ دنیا بھر میں کثیرالجہتی غربت کا شکار افراد کی تعداد بڑھ کر 1.2 ارب ہو گئی ہے، جو گزشتہ جائزے کے مقابلے میں 5 کروڑ 15 لاکھ زیادہ ہے۔ ان متاثرہ افراد میں 61 کروڑ 70 لاکھ بچے شامل ہیں، جبکہ مجموعی طور پر 83 فیصد افراد دیہی علاقوں میں رہتے ہیں۔
رپورٹ کے مطابق جنوبی ایشیا میں غذائیت، رہائش اور تعلیم کے برسوں سے متعلق عالمی محرومیوں کا کم از کم ایک تہائی حصہ پایا جاتا ہے۔ خطے کی تقریباً 19.3 فیصد آبادی کثیرالجہتی غربت کا شکار ہے، جبکہ مزید 18.4 فیصد افراد کو اس غربت میں مبتلا ہونے کا خطرہ لاحق ہے۔
یو این ڈی پی کے منتظم الیگزینڈر ڈی کرو نے کہا ہے کہ غربت میں اضافے سے متعلق اعداد و شمار دنیا کے لیے خطرے کی گھنٹی ہونے چاہئیں۔ ان کے مطابق دنیا بھر میں 1.2 ارب افراد کو بھوک، تعلیم سے محرومی اور صاف پانی یا بجلی کی عدم دستیابی جیسی ایک دوسرے سے جڑی مشکلات کا سامنا ہے۔
رپورٹ کے نتائج ظاہر کرتے ہیں کہ غربت کا مسئلہ صرف مالی وسائل کی کمی تک محدود نہیں، بلکہ بنیادی سہولیات، تعلیم، صحت اور بہتر معیارِ زندگی تک رسائی بھی اس کی اہم جہتیں ہیں۔
