سویڈن نے کچرے کو توانائی میں تبدیل کرنے کا ایسا نظام تیار کرلیا ہے جس کے تحت ملک اب اپنی ضروریات پوری کرنے کے لیے دیگر یورپی ممالک سے بھی کچرا درآمد کرکے بجلی بنانے میں استعمال کرتا ہے۔
بین الاقوامی میڈیا رپورٹس کے مطابق سویڈن میں کچرے سے توانائی پیدا کرنے والے متعدد پاور پلانٹس قائم ہیں، جہاں کچرے کو مخصوص طریقہ کار کے تحت جلایا جاتا ہے اور اس سے توانائی پیدا کی جاتی ہے۔
رپورٹ کے مطابق سویڈن میں ان پلانٹس کی ضروریات پوری کرنے کے لیے مقامی سطح پر دستیاب کچرا کافی نہیں، جس کے باعث ملک دیگر ممالک سے کچرا درآمد کرتا ہے۔
سویڈن ہر سال اپنے پاور پلانٹس میں لاکھوں ٹن کچرا استعمال کرتا ہے۔ کچرے کو جلانے کے عمل کے دوران پیدا ہونے والی نقصان دہ گیسوں اور آلودگی کو کم کرنے کے لیے پلانٹس میں خصوصی آلات بھی نصب کیے گئے ہیں۔
رپورٹس کے مطابق اس عمل سے پیدا ہونے والی بجلی گھروں اور دیگر شعبوں کی توانائی کی ضروریات پوری کرنے کے لیے استعمال کی جاتی ہے، جبکہ کچرے کو ٹھکانے لگانے سے ملک میں مجموعی طور پر کچرے کی مقدار بھی کم ہوتی ہے۔
