مقبوضہ کشمیر کے سابق وزیراعلیٰ اور نیشنل کانفرنس کے صدر فاروق عبداللہ نے کہا ہے کہ پاکستان کی موجودگی کے باعث بھارت مقبوضہ کشمیر کو نقصان پہنچانے سے گریز کرے گا۔ انہوں نے کشمیریوں پر زور دیا کہ وہ اپنے حقوق کے تحفظ کے لیے متحد ہوکر آواز بلند کریں۔
سرینگر میں صحافیوں سے گفتگو کرتے ہوئے فاروق عبداللہ نے کہا کہ پاکستان ہر موقع پر کشمیریوں کی حمایت کرتا ہے۔ انہوں نے سوال اٹھایا کہ کیا کشمیریوں کو نئی دہلی کی حکومت سے انصاف ملنے کی توقع ہے؟
نیشنل کانفرنس کے صدر کا کہنا تھا کہ اگر کشمیری حوصلے کے ساتھ اپنے حقوق کے لیے کھڑے نہیں ہوں گے تو ان کا وجود خطرے میں پڑ سکتا ہے۔ انہوں نے کہا کہ پاکستان عالمی سطح پر مسئلہ کشمیر کو اجاگر کر رہا ہے، جس کے باعث کشمیریوں کی آواز سنی جا رہی ہے۔
فاروق عبداللہ نے مزید الزام عائد کیا کہ بھارت کی مقبوضہ کشمیر کے حوالے سے نیت درست نہیں، اس لیے کشمیریوں کو اپنے حقوق کے تحفظ کے لیے متحد رہنے کی ضرورت ہے۔
